Talib e Husn e Ata Dekh Kahan Baitha Hai – Fazil Maysori

طالبِ حسنِ عطا دیکھ کہاں بیٹھا ہے

یہ ہے دربارِ محمد تو جہاں بیٹھا ہے

مٹ گئے داغِ گنہ اشکِ ندامت کے طفیل

تیز برسات ہوئی ہے تو مکاں بیٹھا ہے

اے غلامِ شہِ ابرار تجھے زیب نہیں

لے کے دل میں خلشِ سود و زیاں بیٹھا ہے

بھیک لینے کو زمانہ ہے مدینے کو رواں

اور تو مایوس و پریشان یہاں بیٹھا ہے

جس جگہ آتے ہیں خدمت کو ملائک کے گروہ

با ادب باش کہ تو آج وہاں بیٹھا ہے

اے بہاروں کے پیمبر کوئی مژدہ مجھ کو

دل میں مدت سے مرے خوفِ خزاں بیٹھا ہے

جس پہ الزام خموشی کا رکھا دنیا نے

دے کے وہ مقتلِ فردا میں اذاں بیٹھا ہے

وہ سفینہ کہ جو غرقاب نہ ہوگا, اس میں

شوق ساحل کا لیے پیر و جواں بیٹھا ہے

منفرد شان ہے فاضل مرے پیغمبر کی

ظلمت و نور کو وہ کرکے عیاں بیٹھا ہے

فاضل میسوری