نغمۂ درودِ پاک
٢٠ اپریل ٢٠١٩ع بروز دوشنبہ، عیسوی سنہ کے اعتبار سے ولادت مصطفیٰ صلی اللہ علیہ کی تاریخ ہے جملہ مسلمانوں سے اپیل ہے کہ اس دن بطور خاص کثرت سے درود وسلام کا اہتمام کریں تاکہ اسکی برکتوں سے ہر وبا وبلا اور رنج وغم دور ہوکر راحتوں کا نیا سویرا نمودار ہو
مومن کی عظمتوں کا نگہباں درود پاک اللہ کی رضا کا گُلِستـاں درود پاک
“صَلُوا عَلیہِ” اور “یُصلّونَ” ہے گواہ حکمِ الٰـہ و سنّتِ رحماں درود پاک
کیاشان ہے کہ اسکو پڑھیں بندہ و خدا تسبیحِ خَلق و رحمتِ یَزداں درود پاک
اپریل بیس ، آمـدِ سرکار کا ہے دن کثرت سے گنگنائیں مسلماں درود پاک
تم ایک بار بھیجو تو دس رحمتیں ملیں دیتا ہے اِتنا اجرِ فراواں درود پاک
یہ آئینہ ہے دیدِ رسول کریم کا یعنی دکھاتا ہے رخِ جاناں درود پاک
جسکی مہک سے عشق رسالت کا ہے فروغ قربِ نبی کا ہے وہ خیاباں درود پاک
وارُفتگانِ عشقِ رسالت سے پوچھئے ہرسانس، ہرنَفَس کا ہے عنواں درود پاک
گرمی ہے جس سےنبضِ محبت کی برقرار نگرانِ جاں ، محافظِ ایماں درود پاک
ہے قربِ مصطفٰی کی یہ سب سے حَسِین ڈور طیبہ سے جوڑتا ہے رگِ جاں درورد پاک
تازہ ہیں اِس بہار سے امن واماں کے باغ کرتا ہے ختم ، آفتِ دوراں درود پاک
اعمال اِس سے پاتے ہیں شرف قبولیت ہےبندگی کا سیّد و سلطاں درود پاک
لے جائے گا بہشت بریں اہل عشق کو دوزخ سے ہے نجات کا ساماں درودِ پا
سارا زمانہ گرچہ تمہارے خلاف ہو ہونے نہ دیگا کوئ بھی نقصاں درود پاک
ہم سب کریں درود کے پڑھنے کا اہتمام دکھ درد میں ہے مونسِ انساں درود پاک
ہر قید سے رہائ یہ ہم کو دلائے گا ہے دافعِ مصائبِ زِنداں درود پاک
آنے نہ دیگا ہم پہ کسی ظلم کی تپش دائم ہے سرپرستِ مسلماں درود پاک
ہونگے اِسی سے چاک ، سبھی پردۂ ستم ہے ظلمتوں میں نَیّرِ تاباں درود پاک
جس درپہ سائلوں کے مقدر سنورتے ہیں تقسیمِ خیر کا ہـے وہ ایواں درود پاک
مقبول و مستجاب ہیں اِس سے عبادتیں تائیدِ حق کا ہے گُلِ ذیشاں درود پاک
ہر لفظ میں ہے عشق و فا کی نئ حیات ہے دائمی کرم کا دبستاں درود پاک
دارین کا عروج ہے جس میں بسا ہوا اعزاز کا ہے ایسا قلمداں درود پاک
بھاری ہے اے فریدی ! یہ فضل و کمال میں لیکن زباں پہ ہے بہت آساں درود پاک
از فریدی صدیقی مصباحی
#یومِ_درود