top of page

نعت کی خوشبو گھر گھر پھیلے

Naat Academy Naat Lyrics Naat Channel-Naat-Lyrics-Islamic-Poetry-Naat-Education-Sufism.png

کوئ مقام نہیں ہے درِ نبی کی طرح

کوئی مقام نہیں ہے درِ نبی کی طرح

جو حاضری کی سعادت ہو حاضری کی طرح

یہ اور بات کہ ہم ان کو دیکھ ہی نہ سکیں

وہ ساتھ ساتھ ہیں آنکھوں کے نور ہی کی طرح

مسیح بن کے ہر اک غم شب ِ فراق آیا

تمہاری یاد بھی آئی تو زندگی کی طرح

جو ان کے ہیں انہیں منزل تلاش کرتی ہے

نہیں جو ان کے ہیں آوارہ اجنبی کی طرح

نہ دیکھا چشمِ فلک نے کوئی کریم ایسا

جو مہرباں ہو عدو پر مرے نبی کی طرح

کسی مقام سے دیکھو کسی طرح دیکھو

وہ ہر جگہ سے ہیں نزدیک روشنی کی طرح

انہیں کے لطف وکرم نے ہمیں سنبھال لیا

اگر گرے بھی سرِ راہ بے بسی کی طرح

غرور ِ زہد و عبادت کو یہ نہیں معلوم

کوئی عمل نہیں مقبول عاجزی کی طرح

نقاب اٹھاؤ دکھا دو تجلیاں اپنی

یہ رات ہجر کی چھٹ جائے تیرگی کی طرح

شراب عشق سے بڑھتی ہے تشنگی میری

نہیں ہے سیر کوئی میری تشنگی کی طرح

مقامِ سرور ِ عالم خدا کو ہے معلوم

کھڑے ہیں سدرہ پہ جبریل حیرتی کی طرح

نہ تھا نہ ہے نہ کبھی ہوگا کوئی ایسا کریم

سنبھال لے جو تری بندہ پروری کی طرح

وہ نام ہی تو بہار جہاں کا ضامن ہے

جو نام ہوتا ہے محسوس تازگی کی طرح

خدا کا ذکربھی ذکر ِ رسول ہے خاؔلد

شعارِ نعت ہمارا ہے بندگی کی طرح

5 views
bottom of page