زیرِ سایۂ گنبد رات کا بسیرا ہے اور سنہری جالی سے رونما سویرا ہے
جابجا مدینے میں حاجیوں کا ڈیرا ہے مصطفٰیﷺ کے کوچے میں سائلوں کا پھیرا ہے
رات بھی مدینے کی کتنی خلد منظر ہے اک ذرا اُجالا ہے اک ذرا اندھیرا ہے
طائرو کے جھُرمٹ میں وہ کَلَس کا نظّارہ شمع کو پتنگوں نے ہر طرف سے گھیرا ہے
میری خوش نصیبی پر رشک آئے رضواں کو مصطفٰےﷺ اگر کہہ دیں یہ غلام میرا ہے
نور کے سمندر میں غرق ہیں مہ و انجم جب سے ماہِ طیبہ نے چاندنی بکھیرا ہے
رات بھی مدینے کی دن سے کم نہیں اجمؔل شام بھی مدینے کی خوش نما سویرا ہے
اجمل سلطان پوری