top of page

نعت کی خوشبو گھر گھر پھیلے

Naat Academy Naat Lyrics Naat Channel-Naat-Lyrics-Islamic-Poetry-Naat-Education-Sufism.png

جن کا شیوہ ہے بندہ نوازی

کچھ اور میری تمنّا نہیں سوائے کرم کرم کی بھیک دو مجھ کو میں ہوں گدائے کرم تمہاری ذات ہے سرچشمۂ کرم آقا خدائے خلق کیا ہے تمہیں برائے کرم

جن کا شیوہ ہے بندہ نوازی ہے سخی جن کا سرا گھرانہ

آرہے ہیں وہ دیکھو محمد بانٹنے رحمتوں کا خزانہ

ربط ہے جس عشق نبی سے رشک ِ جنّت ہے وہ بے قراری

ہر تڑپ اک پیامِ سکوں ہے زندگی بن گئی ہے ترانہ

اشک بہتے ہیں ہجرِ نبی میں لطف کچھ بھی نہیں زندگی میں

مسکرائیں گے جس روز ہوگا قافلہ سوئے طیبہ روانہ

اک نگاہ ِ کرم یا محمد بے سہارا ہیں ہم یا محمد

آپ ہی سب کے فریاد رس ہیں آپ سنتے ہیں غم کا فسانہ

بے بسی نے جہاں بھی گرایا آ کے سرکار نے خود اٹھایا

ان کو جلوہ دکھانا تھا اپنا بے بسی بن گئی اک بہانہ

اتنا کامل ہو ذوق محبت اتنا پختہ ہو رنِگ عقیدت

سر جھکائیں جہاں بھی ادب سے رو برو ہو وہی آستانہ

وہ عطا پر عطا کر رہے ہیں رات دن جھولیاں بھر رہےہیں

ان کے ٹکڑوں پہ سب پل رہے ہیں ان کا محتاج ہے سب زمانہ

آفتاب ِ قیامت کی گرمی ہم پہ خاؔلد اثر کیا کرے گی

ہم ہیں ان کے ہمارے سروں پر ان کی رحمت کا ہے شامیانہ

20 views
bottom of page