top of page
Naat Academy Naat Lyrics Naat Channel-Naat-Lyrics-Islamic-Poetry-Naat-Education-Sufism.png

نعت کی خوشبو گھر گھر پھیلے

تکیں گی حسرتیں حیرت سے منہ ہم ناسزاؤں کا

تکیں گی حسرتیں حیرت سے منہ ہم ناسزاؤں کا کھلے گا منہ جو محشر میں شفاعت کے خزانوں کا

تسلی آپ خود فرمائیں گے ہم سے غلاموں کی انہیں کیوں کر گوارا رنج ہوگا سوگواروں کا

دم آخر مدینے کی طرف منہ پھیرلیتے ہیں تخیّل کتنا پاکیزہ ہے ان کے تشنہ کاموں کا

الہٰی آج تو پیشانیوں کی لاج رہ جائے چلا ہے قافلہ طیبہ کو پھر آشفتہ حالوں کا

لرزتا ہو نظام ایں و آں جس کے اشارے پر نمونہ حشر کو کیا کہئے اس گل کی اداؤں کا

کہیں گرنے کو ہوتے ہیں تو قدرت تھام لیتی ہے نصیبہ تو کوئی دیکھے کسی کے بے قراروں کا

شفاعت کے لئے راہیں ہُویدا کیجئے یعنی تصور باندھئے ان کی کرم پرور نگاہوں کا

خزانے یہ لٹا دیتے ہیں جب دینے پہ آتے ہیں زمیں سے آسماں تک شور ہے ان کی عطاؤں کا

اشارہ ان کا ہوجائے کبھی وہ دن خدا لائے کہ عالم ہم بھی جا دیکھیں مدینے کی فضاؤں کا

توجہ سنّیوں پر کیوں کر نہ ہو بارہ اماموں کی کہ دامن ہاتھ میں آیا ہے ان کے چار یاروں کا

دعا کیجئے خلیؔل آواز یہ بغداد سے آئے کہ جا ہم نے کیا تجھ کو غلام اپنے غلاموں کا

4 views
bottom of page