top of page
Naat Academy Naat Lyrics Naat Channel-Naat-Lyrics-Islamic-Poetry-Naat-Education-Sufism.png

نعت کی خوشبو گھر گھر پھیلے

بڑے لطیف ہیں نازک سے گھر میں رہتے ہیں

بڑے لطیف ہیں نازک سے گھر میں رہتے ہیں میرے حضورﷺ میری چشم تر میں رہتے ہیں

ہمارے دل میں ہمارے جگر میں رہتے ہیں انہی کے گھر ہیں یہ وہ اپنے گھر میں رہتے ہیں

یہ واقعہ ہے لباسِ بشر بھی دھوکا ہے یہ معجزہ ہے لباسِ بشر میں رہتے ہیں

مقام ان کا نہ فرش زمیں نہ عرش بریں وہ اپنے چاہنے والوں کے گھر میں رہتے ہیں

ملائکہ بھی عقیدت سے دیکھتے ہیں انھیں جو خوش نصیب نبیﷺ کے نگر میں رہتے ہیں

یقین والے کہاں سے چلے کہاں پہنچے جواہل شک ہیں اگر میں مگر میں رہتے ہیں

خدا کے نور کو اپنی طرح سمجھتے ہیں یہ کون لوگ ہیں کس کے اثر میں رہتے ہیں

رہیں وہ اپنوں سے غافل ارے معاذ اللہ خوشا نصیب ہم ان کی نظر میں رہتے ہیں

وہ اور ہی تھا جو قوسین پر نظر آیا مَلک تو اپنی حد بال وپر میں رہتے ہیں

جو اخؔتر ان کے تصور میں صبح و شام کریں کہیں بھی رہتے ہوں طیبہ نگر میں رہتے ہیں

82 views
bottom of page