top of page

نعت کی خوشبو گھر گھر پھیلے

Naat Academy Naat Lyrics Naat Channel-Naat-Lyrics-Islamic-Poetry-Naat-Education-Sufism.png

اے مسلمان! اگر شاہِ اُمَم تیرے ہیں

لوح و قلم تیرے ہیں

کی محمد سے وفا تو نے، تو ہم تیرے ہیں یہ جہاں چیز ہے کیا ، لوح و قلم تیرے ہیں

قلندر لاہوری ڈاکٹر اقبال کا یہ شعر ، علما ، خطبا ، شعرا اور عوام کو صرف یاد ہی نہیں بلکہ حِرزِ جاں بنا ہوا ہے عوام و خواص میں اِس کی مقبولیت سے اندازہ ہوتا ہے کہ بارگاہ خدا و رسول صلی اللہ علیہ وسلم میں یہ قبول ہو چکا ہے ، اسی پر یہ چند اشعار ملاحظہ فرمائیں – – – – – –

اے مسلمان ! اگر شاہِ اُمَم تیرے ہیں ” یہ جہاں چیز ہے کیا ، لوح و قلم تیرے ہیں “

تیری فطرت میں ہیں گر حُبِ نبی کے جوہر پھر تو ہر ایک بلندی پہ قدم تیرے ہیں

سَروَرِ دیں سے وفا ، شوکت و اعزاز کی روح اُن کے فرمان پہ چل ! جاہ و حَشَم تیرے ہیں

ہے زمانے میں سدا ، عشقِ نبی ہی غالب اُن کا بن جا ! تو قیادت کے عَلَم تیرے ہیں

نام پر اُن کے لُٹا ، پہلے مَتاعِ ہستی پھر ذرا دیکھ ! کہ کیا ناز و نِعَم تیرے ہیں

حِفظِ ناموسِ رسالت میں اگر موت آئ حوض کوثر ترا ، باغاتِ اِرَم تیرے ہیں

ان کی سُنَّت کو جو سرمایۂ ہستی کر لے تخت و تاج و ظَفَر و دام و درم تیرے ہیں

دل کے پیمانے میں بھر ! یادِ نبی کے آنسو سب بدل جائیں گے خوشیوں سے ، جو غم تیرے ہیں

تجھ سے راضی ہیں جو اللہ رسول اے مومن پھر تو دارین کی عزت کے حرم تیرے ہیں

قولِ رب لکھ گیے کیا خوب ، فریدی ! اقبال ” کی محمد سے وفا تو نے تو ہم تیرے ہیں” – – – – – – –

از فریدی صدیقی مصباحی، بارہ بنکوی ، مسقط عمان 96899633908+

11 views
bottom of page