اس دیارِ قدس میں لازم ہے اے دل احتیاط

اس دیارِ قدس میں لازم ہے اے دل احتیاط بے ادب ہیں کر نہیں پاتے جو غافل احتیاط

جی میں آتا ہے لپٹ جاؤں مزار پاک سے کیا کروں ہے میرے ارمانوں کی قاتل احتیاط

اضطراب عشق کا اظہار ہو بے حرف و صوت اے غم دل احتیاط اے وحشت دل احتیاط

عشق کی خودرفتگی بھی حسن سے کچھ کم نہیں ہے مگر اس حسن کے رخسار کا تل احتیاط

انکے دامن تک پہونچ جائیں نہ چھینٹیں خون کی ہے تڑپنے میں لازم مرغ بسمل احتیاط

آبتاؤں تجھ کو میں ارشاد اَوْادنیٰ کا راز ان کے ذکر قرب میں لازم ہے کامل احتیاط

صرف سدرہ تک رفاقت اور پھر عذر لطیف عقل والو ہے ادائے عقل کامل احتیاط

بس اسی کو ہے ثنائے مصطفیٰﷺ لکھنے کا حق جس قلم کی روشنائی میں ہو شامل احتیاط

نام پر توحید کے انکار تعظیم رسولﷺ کیا غضب ہے کفر کو کہتے ہیں جاہل احتیاط

اس ادب نا آشنا ماحول میں اخؔتر کہیں رہ نہ جائے ہو کے مثل حرف باطل احتیاط

#تجلیاتسخن #حضورسیدمحمدمدنیاشرفیجیلانی